期指結算日牛證升唔足?
2016-04-28 黃集恩
今日係期指結算，大市上午曾升逾250點，但係見到有一牛證當時只升約20格(即200點左右)，有投資者問係唔係同期指結算期貨要轉倉去5月合約有關。(5月期指比4月低約100點)
經過仔細研究後，發現其實同期貨轉倉無關。雖然5月期貨目前係比4月低100點，但其實我地系統喺計價嗰陣會用5月期貨推算返現價，即係將預期嘅股息加返入5月期貨入面，令轉倉時唔會出現太大波動。
咁點解隻牛證會好似升少左？原來係同隻牛證嘅年期同對沖值有關。你可能問「牛熊證對沖值唔係等於1咩？」，一般中短期牛熊證對沖值的確接近1，但係如果係出年17年中先到期，仲有成400日嘅牛證，由於年期長，所以系統計價時會將未來一年可能會派嘅股息納入考慮之內，牛證嘅對沖值就會低過1，而長期熊證嘅對沖值就可能會高過1。
用返呢隻牛證，佢係17年6月到期，對沖值因此只有0.8，所以當大市升250點時，隻牛證嘅升幅就係250/10000*0.8 = $0.02，即係20格啦。
目前一般報價機都計唔到牛熊證嘅對沖值，但係如果比較仔細嘅投資者想知，歡迎打返我地法巴熱線電話2108-5600查詢。