課堂重點
本課詳細拆解會影響界内證價格的因素及到期結算。
上集同大家講過咩係界内證，今集同大家詳細拆解會影響界内證價格嘅因素，同埋到期結算。
時間值因素
首先，界内證同牛熊證甚至窩輪都好唔同，因為投資界内證時，只要相關資產嘅價格係喺上下限價範圍之內，相關資產嘅價格越唔郁就越好，因為到期時咁樣先可以攞到1.0元嘅界內結算價。但係你可能會問，咁樣買界内證，咪次次都要等到到期時先有得賺？咁咪等到頸都長？其實都唔係嘅，因為當相關資產嘅價格係喺上下限價範圍之內，界内證每日嘅價值就會越嚟越接近1.0元嘅結算價，而呢個情況亦會反映喺發行商嘅報價入面，所以如果投資者唔想等到到期，就可以早D喺市場上賣出。
當然有嬴就會有輸，如果相關資產嘅價格係喺上下限價範圍之外，咁界内證每日的價值就會越嚟越接近0.25元嘅界外結算價，投資者就可能會輸錢。
相關資產價格因素
除左時間值因素之外，相關資產價格亦會有影響，特別是靠近上限價或下限價時。你諗下，如果相關資產個價由上下限價範圍之外，升或跌回上下限價範圍之內，咁隻界内證係咪應該值錢左？
相反，如果相關資產個價由上下限價範圍之內，跌出或升穿至上下限價範圍之外，咁隻界内證就會變得冇咁值錢。呢個情況，會喺界内證越接近到期日時越明顯。
相關資產的引伸波幅
引伸波幅!!!無錯，你冇睇錯，係引伸波幅!!一樣大家睇左法巴學堂咁耐，可能都未完全掌握地嘅野。界内證亦會受引伸波幅影響，但同窩輪唔一樣，唔係次次縮窩就係壞。你試諗下，如果相關資產個價喺上下限價範圍之內，你個時係唔係最想相關資產企定定唔郁，咁到期時就可以收到1.0元嘅結算價？所以呢個情況下，縮窩反而會令界内證價格上升。但係如果相關資產個價喺上下限價範圍之外，咁你就會希望相關資產引伸波幅大D升高D，等佢多D機會升或跌回上下限價範圍之內，令隻界内證變得值錢D。相反嚟講，如果相關資產個價喺上下限價範圍之外時再加上引伸波幅又跌，或者相關資產個價喺上下限價範圍之內不過相關資產預期上落波幅好大，咁樣都可能令界内證變得冇咁值錢。
到期結算
界内證到期時，當然要計下投資者可以收幾多錢。
界内證到期計價同窩輪有一點相似，就是相關資產的結算價。
先複習一次指數的結算價:
指數結算價係到期當日嘅EAS (Estimated Average Settlement)，即係由官方公布，指數結算日當天，由上午9:35分起，至下午3:55分之間每5分鐘的指數及當日指數收市價之平均水平作計價， 呢個數呢，港交所喺當日收市後就會公布。
至於股份嘅界内證結算價，其實係指同界内證掛鈎嘅相關資產，到期日之前五個交易日嘅平均收市價，記住係「之前」嘅五個交易日，即係到期日當日係唔計架。情況就同股份輪一樣。
無論係指數界内證定股份界内證，
如果結算價係處於上限及下限價之內(包括等於上限價或等於下限價)，每股界内證將結算於界內結算價1.0元
如果結算價係處於上限及下限價之外(不包括等於上限價或等於下限價)，每股界内證將結算於界外結算價0.25元
界內證是新發行產品，目前市場上並未有可作比較的類似產品