法巴輪證課程 「中港連線」第三課:A股ETF輪證比較

投資者如果想部署A股ETF嘅槓桿產品,相信相關窩輪同牛熊證,都可能係心水選擇之一。問題黎啦,如果市場上又有窩輪、又有牛熊證,咁我應該揀輪、定揀證好呢?

牛熊證同窩輪的比較

之前嘅《法巴學堂》都講過,牛熊證嘅實際槓桿有機會高啲,時間值同引伸波幅都並非影響價格嘅重要因素,但就有收回機制,一掂到收回價就會停牌,就算之後跟返你部署嘅方向郁,都冇計喇;至於窩輪就會受到時間值損耗同引伸波幅影響,不過就無收回機制,短暫睇錯方向之後,如果又跟返你部署嘅方向郁,投資者都仲可能有機會架。將之前學左嘅野套返入A股ETF窩輪同牛熊證,都完全啱用架!

A股ETF牛熊證實際槓桿計算例子

市場上較多輪證選擇的A股ETF,有南方A50(2822)同安碩A50(2823),等我舉個例子黎解釋下,假如南方A50而家係12元,一隻收回價喺11元、行使價喺10.7元、換股比率10兌1嘅牛證,理論價係0.13元 ( (12–10.7) / 10)(為左方便計算,呢度我地假設財務費用為0,但實際投資需要計算財務費用)。咁實際槓桿呢?由於對沖值接近1,就當佢係1啦,輕輕鬆鬆,就有9倍以上嘅槓桿 ( 12 / 0.13 / 10 )。

  南方A50牛證
收回價 11.00元
行使價 10.70元
換股比率 10兌1
實際槓桿 9.2倍
牛證價格 0.130元

 

A股ETF窩輪實際槓桿計算例子

如果都係10兌1嘅窩輪呢?年期通常都會比較長,而且由於對沖值唔係100%,所以槓桿通常都比較低。好似呢隻南方A50CALL輪咁,假設現價係12元,對沖值有50%,換股比率10兌1嘅CALL輪,計返數,實際槓桿得5倍咋 ( 12 / 0.120 / 10 x 0.5),同牛證真係有啲距離。

  南方A50認購
行使價 12.50元
到期日 18年10月
換股比率 10兌1
實際槓桿 5倍
認購證價格 0.120元

 

A股ETF衍生工具的比較

所以從以上例子,如果投資者想做A股ETF衍生工具部署,10兌1牛熊證價格低,實際槓桿高,但有收回機制;10兌1窩輪價格都唔貴,但實際槓桿相對較低,不過就冇收回機制,點揀?投資者要因應返自己做部署的時間長短,同承擔風險能力黎考慮啦!

  10兌1牛熊證 10兌1窩輪
產品價格 相對較低 相對較低
實際槓桿 相對較高 相對較低
收回機制
引伸波幅 並非影響價格的重要因素 需要考慮
時間值 並非影響價格的重要因素 需要考慮

 

市面上唔止得10兌1嘅窩輪同牛熊證。所以要留意唔同嘅換股比率都會對輪證嘅條款有影響。有關換股比率嘅詳細解釋,可以睇返法巴學堂《牛熊證篇第七課》或《認股證篇第五課》。

考考你

合成A股ETF是持有真實A股。

你答錯了!

A股ETF有兩種。合成A股ETF是持有A股的衍生工具; 持有真實A股的, 是實物A股ETF。