法巴輪證課程 「認股證篇」第五課：換股比率及街貨量

影響窩輪價格的因素有好多，今集我地集中講換股比率同街貨量。

換股比率影響輪價

換股比率的意思，就係控制1股股份所需的窩輪股數，咩意思呢？大家有時可能會發現，明明兩隻窩輪，掛鈎嘅資產一樣，行使價一樣，年期一樣，連引伸波幅都差唔多，點解個價格差左好遠，甚至係10倍以上嘅？呢個情況，好可能就係換股比率有唔同。

舉個例子，一箱鮮榨果汁有200支，價錢同生果價格掛鈎，會跟住生果嘅價格變。買左一箱返黎，如果有10個人分，每人就分到20支，就要俾20支嘅價錢；但如果100個人分，每人就分到2支，每個人俾嘅錢少啲，只需要俾2支嘅價錢。

套返入窩輪，換股比率就好似有10個人分同100個人分果汁一樣，由於分到嘅果汁數量唔同，每個人俾嘅錢都唔同；就好似10兌1同100兌1的窩輪一樣，10兌1嘅會貴過100兌1，只因除細左，個價錢就要貴啲；而窩輪價格受正股價格影響，就好似果汁價格受生果價格影響咁。

咁唔同換股比率對隻窩輪有咩影響呢？其實係會影響到隻輪嘅價格，如果比較10兌1同100兌1嘅窩輪，假設行使價、到期日、引伸波幅等因素不變，10兌1嘅選擇，輪價會貴啲；至於100兌1嘅選擇，輪價會平啲。

街貨量影響市場供求

至於街貨量，就係指有幾多貨喺街，由其他投資者持有。發行商出一隻產品時，都會制訂發行量，呢個係指發行商一開始有幾多貨可以賣嘅數量。當產品上市後，有其他投資者買左並持有，咁街貨量就會增加，發行商會每日都將旗下每隻產品嘅街貨量上報港交所，投資者就可以喺報價機，或者發行商網站，睇下隻產品在對上一個交易日收市時，有幾多貨賣左出街。

咁街貨量有咩用呢？其實呢個都係投資者決定買一隻產品時，需要考慮的因素之一，因為如果隻產品街貨量升到好高，發行商嘅開價能力會受到影響，到時供求因素有機會凌駕喺其他因素之上，影響到隻輪嘅價格。

唔明？又係例子時間，舉返一個舊例子，我地喺牛熊證時講過賣演唱會飛，當啲飛賣得七七八八，主辦單位無咩貨喺手可以，咁就有機會俾拎住飛嘅人，將價錢定喺唔合理嘅水平，同一個道理放在窩輪上，市場嘅供求就變成影響隻產品價格嘅一個重要因素。

咁唔同換股比率對隻窩輪有咩影響呢？其實係會影響到隻輪嘅價格，如果比較10兌1同100兌1嘅窩輪，假設行使價、到期日、引伸波幅等因素不變，10兌1嘅選擇，輪價會貴啲；至於100兌1嘅選擇，輪價會平啲。

*以上例子的目的是以日常生活來比喻窩輪的某一種條款或特性，讓投資者更容易初步了解窩輪產品。以上例子並不能代表亦不能完全覆蓋窩輪的所有條款或特性。投資者投資時需要全面了解窩輪的條款，特性和風險。