法巴輪證課程 「認股證篇」第三課：影響窩輪價格的市場因素

上集同大家講到，窩輪的價值，由內在值同時間值組成，唔知大家記唔記得呢？

相關資產的價格

影響窩輪價格嘅主要因素有好幾個，第一，係相關資產嘅價格，呢個相信比較易明。以CALL輪為例，一隻價內輪，當相關資產嘅價格越升，資產價格同行使價的差距越大，內在值就會提升，從而利好輪價。即使係價外輪，如果相關資產嘅價格越升，就算未到價，升穿行使價嘅機會亦會增加，因此輪價理論上亦會受惠。

時間值

第二個因素，自然係時間值。上集講過，年期越長的窩輪，所包含嘅時間值就越大，但窩輪每日有時間值損耗，越近到期，意味剩低嘅時間值就會越黎越少。所有窩輪到期時嘅時間值就會變做零，所以隨住時間過去，無論係CALL輪定PUT輪，時間值都會逐步扣減，不利輪價架。

利率

第三個因素，係利率，一般係指香港息率。當利率上升時，Call輪價格理論上會正面受惠，而Put輪價格將會受到負面影響。為甚麼呢？投資者買CALL輪，某程度上係因為發行商代投資者持有左正股，當利率上升，持貨成本增加，CALL輪就會貴左，相反PUT輪就會平左。不過香港息率接近零，窩輪年期普遍唔夠一年，利率呢個因素嘅影響力幾乎係微乎其微。

派息

第四係相關資產嘅派息。一般而言發行商會喺沽出CALL輪後買入正股作為對沖。發行商喺出一隻窩輪時，已經根據過往派息歷史，將預期的股息計算落窩輪價格入面，所以一般情況下，派息係唔會影響到輪價；不過，如果派息突然同原本發行商預期有大出入，或者除息日同以往不同，咁發行商原本預期會從股票上收嘅股息有變化，咁就有機會影響輪價。舉例嚟講，如果派息突然多過預期，即係除淨後股價會低左，所以CALL輪價格會即時反映並下跌，而Put輪價格會上升。

舉個例子，有隻股份股價係50元，本來佢年年都係派1元息，假如所有因素唔變，除完息就會變左49元；但有一年，佢突破派左2元息，即係除完息佢會變成48啦，由於價格會自動變低左，同佢掛鈎的CALL輪，價格都會跌左，而PUT輪就會高左。

引伸波幅

最後仲有一點，亦係最多投資者唔明嘅一點，就係引伸波幅。引伸波幅係指市場對正股價格未來波動性的預測，簡單黎講，預期波動性越高，引伸波幅就上升，call輪同put輪價格都會受惠，但比喻長假期前，由於預期交投一般較靜，咁引伸波幅就可能下跌，於是call put輪價格都會受到負面影響。遲啲嘅法巴學堂，我地會再詳細講解咩係引伸波幅。

一口氣講左咁多，係時候黎個總結，唔同因素點樣影響輪價，我地一眼睇晒！