法巴輪證課程 「認股證篇」第九課：窩輪實戰：鎖利及對沖

講左窩輪咁耐，係咪都想親身參與下？窩輪除左可以作為以小博大嘅投資工具，如果配合到正股買賣，仲可以幫到大家配置資產組合，呢課會集中講兩種策略，鎖利，同對沖。

鎖利部署

先講鎖利，顧名思義，就係點樣鎖定利潤。有時投資者買左隻正股，升左，有錢賺，當然好開心啦，但幾時放好呢？放左，會唔會仲有得升？但唔放，會唔會之後跌返架？個心係咪十五十六呢？喺呢個時候，窩輪幫到你。

方法好簡單，當你買左果隻股票升左之後，先行沽出部分正股，鎖定左一部分利潤先，再購入與同一資產掛鈎嘅窩輪，由於窩輪具有以小博大嘅特性，投資者可以用少啲資金，部署同一數量嘅正股。

如果之後正股繼續升，當然再開心啲，因為股票同窩輪價格都有得升；但如果慘慘豬跌呢？由於窩輪的成本較低，而且蝕晒都只係投入嘅全部本金，而你之前已經鎖定左部分利潤，如果條數計得好，潛在虧損將會減低！

至於條數點計？有條方程式之俾大家參考，

投資者揀左想用黎做鎖利部署的窩輪後，拎佢嘅對沖值同換股比率，代入呢條方程式，再將沽左嘅正股數目代入去計，就可以計到，究竟要買幾多份窩輪，先代替到已經鎖定利潤嘅正股啦。

對沖部署

至於對沖又係點呢？當你買入左隻股票後，當然希望佢股價會升，但又擔心佢會跌，咁點算呢？呢個時候，就可以考慮對沖部署啦，方法係，在買入正股時，同時買入與同一資產掛鈎嘅認沽證。

當正股股價升時，認沽證可能會蝕錢，但佢最大損失都係投入嘅全部本金，以小博大嘅特性令佢嘅成本減低左。雖然成個投資組合計，會賺少左錢，但用認沽證買個安心，可以降低部署嘅風險。

而如果正股股價真係跌呢？正股的投資者當然有虧損，但係認沽證價格會升，帶黎嘅盈利可以抵銷正股嘅虧損喎，成個投資組合計，風險都係降低左。

至於究竟要買幾多認沽證呢？揀左隻輪後，代返入鎖利條公式，就得架啦。