課堂重點
本課介紹引伸波幅的概念，以及引伸波幅如何影響窩輪價格。
上集我地講過，引伸波幅係影響窩輪價格嘅其中一個重要因素，但好多投資者都唔係好明，咩係引伸波幅，等我地詳細解釋下。
資產價格未來波動性預測
引伸波幅，係指市場對某一樣資產的價格，未來波動性的預測。呢個預測唔係單一方向睇升定睇跌，而係整體上，講佢嘅向上、向下的幅度有幾大。
咩意思呢？我地舉啲例子，重磅股匯豐(0005)，成日都俾人叫「大笨象」，就係因為佢郁得慢，除非在個別大市好波動嘅日子，否則通常都係郁少少，就成隻「大笨象」停左喺度。由於市場通常都覺得，匯豐股價的波動性有限，所以匯豐窩輪嘅引伸波幅，通常都比較平穏。
我地又舉另外一個例子，今次輪到賭業股銀河娛樂(0027)，股價在2014年的高位，係84.5元，但係去到2015年9月，低位唔夠20元(19.5元)，兩年唔夠，高低差距3倍幾！亦令市場覺得，呢隻股份的價格波動性會比較高，發行商唔敢掉以輕心，所以銀河娛樂窩輪嘅引伸波幅，通常都比較高。
資產波動性與價格
仲係唔明？大家可以諗下我地去旅行買保險，如果去日本、新加坡呢類治安比較好嘅國家，大家買旅行保險嘅費用，係咪都比較平呀？但如果我地去啲戰亂國家呢？旅行保險的收費一定貴好多，點解？學司徒師傅話齋，「出事架麻」嘅機會都大好多嘛！套返入窩輪，波動性一般較大嘅股份，同佢掛鈎嘅窩輪，引伸波幅都會高啲，即係大家嘅買入成本都可能要高啲！
要留意嘅，係引伸波幅係每日、每個鐘、甚至每分鐘都會變！諗返旅行保險嘅情況，當某啲國家治安變差左，又或者有旅遊警示，保費係咪都會加呀？
套返入窩輪，如果正股價格突然變得波動，發行商用黎對沖窩輪嘅期權，引伸波幅都會變動，咁交易員就會將期權引伸波幅的變化，反映在窩輪嘅引伸波幅上，咁窩輪的引伸波幅就會出現變化。好似上堂咁講，引伸波幅升，call輪同put輪價格理論上都會上升，而當引伸波幅下跌時，就call/ put輪價格理論上都要跌，明唔明呀？
明嘅話就試下答考考你睇下你識幾多啦。
*以上例子的目的是以日常生活來比喻窩輪的某一種條款或特性，讓投資者更容易初步了解窩輪產品。以上例子並不能代表亦不能完全覆蓋窩輪的所有條款或特性。投資者投資時需要全面了解窩輪的條款，特性和風險。