課堂重點
本課介紹窩輪的基本概念，以及認購證及認沽證兩種不同的窩輪產品。
如果投資股票，當然係希望獲利啦；而投資窩輪，就更再進一步，利用槓桿特性，去部署一個資產，希望達到以少博大的效果。
甚麼是窩輪
成日聽人講窩輪，究竟係咩黎呢？其實窩輪，是英文warrant的譯音，真正嘅中文名係認股證，係指一個「權利」，可以俾投資者在指定嘅日期，以指定的行使價，購買或者沽出相關資產，呢個涉及嘅資產，可以是股票、指數、商品、貨幣、一籃子的股票，甚至是外國股票。雖然定義上係話買賣相關資產，但實際上香港絕大部份窩輪都係現金交收，即係只計輸羸而唔會有真正資產轉移。
窩輪最初出現，係由上市公司發行，用黎集資，或者回饋員工及股東嘅，但後來發展落去，就多左一種由投資銀行發行嘅衍生窩輪。衍生窩輪係一種在交易所買賣，俾投資者部署某一種資產，向邊個方向郁嘅產品。既然窩輪是買入、或賣出相關資產嘅權利，基本黎講，會有認購證同認沽證之分。
認購證及認沽證
認購證，顧名思義，是指讓持有者擁有購入相關資產的權利，所以當相關資產的價格上升時，認購證價值理論上亦會相應上升，屬於看好的投資工具，香港散戶會叫佢做「Call 輪」。
與認購證相反，認沽證就是讓持有者擁有沽出相關資產的權利，所以當相關資產的價格下跌，認沽證價值理論反而會上升，屬於看淡的投資工具，香港散戶習慣稱之為「Put 輪」。
睇下呢個表就一目了然啦。一句講晒，CALL係睇好，PUT係睇淡，「其實唔難」！
| 認購證/ Call 輪 | 認沽證/ Put 輪 | |
|---|---|---|
| 對後市看法 | 看升 | 看跌 |
| 正股價格上升 | 窩輪價格上升 | 窩輪價格下跌 |
| 正股價格下跌 | 窩輪價格下跌 | 窩輪價格上升 |
雖然窩輪喺香港比牛熊證早出現 (90年代，可能仲早過你出世)，但係窩輪對唔少投資者黎講，可能是仲複雜啲嘅產品。有睇過法巴學堂《牛熊證篇》嘅觀眾可能記得，牛熊證有收回價、行使價、實際槓桿、換股比率，到期日等條款，仲有個強制收回機制；而窩輪呢？同牛熊證一樣，都會有行使價、實際槓桿、換股比率，到期日等，但係就冇牛熊證嘅收回價，不過就會受引伸波幅，同時間值損耗嘅影響。
引伸波幅？時間值？咩黎架？食得架？放心，法巴學堂黎緊會慢慢教識你！
*以上例子的目的是以日常生活來比喻窩輪的某一種條款或特性，讓投資者更容易初步了解窩輪產品。以上例子並不能代表亦不能完全覆蓋窩輪的所有條款或特性。投資者投資時需要全面了解窩輪的條款，特性和風險。
考考你
息率是影響窩輪價格的市場因素之一。當利率上升時，Call輪價格理論上會正面受惠，而Put輪價格將會受到負面影響。