法巴輪證課程

我地一直講講講,講左窩輪嘅特性,影響價格嘅唔同因素,仲有敏感度、結算嘅方法等,如果有投資者真係有興趣想部署窩輪,其實應該點做好呢?為左方便大家,我地集諸家之大成,總結成一套心法,佢就係「窩 輪 五 步 曲」!

第一步,建立看法!

無論買CALL定買PUT,首先係你要有睇法先,你係睇好定睇淡?呢個係方向問題。

如果係睇好,你睇好嘅,係指數、股票、外匯、商品定其他野?呢個係選擇問題,你要對特定嘅資產,有一個明確嘅睇法,先可以再尋找佢嘅相關產品。

第二步,揀槓桿!

窩輪有以小博大的特性,而一隻窩輪的實際槓桿,就係倍大潛在回報或者虧損的指標。

高啲實際槓桿,睇中方向當然好,但如果睇錯方向,虧損都會倍大左;如果實際槓桿低啲,睇中方向可以獲得嘅回報,可能會少啲,但睇錯方向嘅虧損都會少啲。

而實際槓桿嘅高低,又取決於行使價的高低,以及年期嘅長短,假設其他因素不變,較價外的產品,實際槓桿會高啲,到價或價外的會低啲,而年期方面,短身的產品,實際槓桿會高啲,而長身嘅就會低啲,所以投資者可以根據自己承擔風險嘅能力、同部署的時間,去揀適合自己嘅產品。

第三步,睇引伸波幅!

我地在第四課,已經講解左引伸波幅係咩,投資者揀左資產、方向同實際槓桿之後,可能都會發現有好幾隻產品,條款都差唔多,點揀好呢?

留意下引伸波幅,引伸波幅的高低,會影響到輪價嘅高低,但唔係低引伸波幅、隻輪平啲就一定好,反而我地要留意嘅,係隻輪嘅引伸波幅,在過去一段時間係咪維持穩定,大家都唔想買左隻產品後,引伸波幅又大上又大落,穩定嘅引伸波幅,將可減少持輪可能面對嘅變數,而引伸波幅嘅歷史數據,可以在發行商嘅網站搵到。

第四步,睇街貨量!

呢個比較簡單,第五課都講過,揀完之後,如果隻輪街貨特別高,就要留意佢嘅價格可能較受市場供求影響,俾個貼士大家,好多時引伸波幅低嘅窩輪,街貨都比較高,大家唔好貪平呀!

第五步,最後一步,睇買賣差價!

第六課時,教過大家計窩輪跳動的敏感度,發行商會因應隻輪嘅敏感度,開出買盤同賣盤,而兩者之間嘅差價,可能係投資者一買一賣嘅成本。

要教大家「最佳買賣差價」嘅概念,是指根據產品嘅敏感度,而開出的合理差價,舉例,如果某窩輪是正股跳動1格,輪價理論上跳動2格,最佳買賣差價理論上就係2格。

買賣差價當然愈窄愈好,因為代表投資者的買賣成本都可以減低。

大家記住呢啲步驟,就可以試下喺實戰上,可唔可以應用到啦!

*以上例子的目的是以日常生活來比喻窩輪的某一種條款或特性,讓投資者更容易初步了解窩輪產品。以上例子並不能代表亦不能完全覆蓋窩輪的所有條款或特性。投資者投資時需要全面了解窩輪的條款,特性和風險。

考考你

息率是影響窩輪價格的市場因素之一。當利率上升時,Call輪價格理論上會正面受惠,而Put輪價格將會受到負面影響。

你答錯了!

當一個投資者買入Call輪代替正股,可以節省成本,而省下的資金或可選擇放入銀行收息,而在加息環境下,存款理論上將可獲得更多的利息,相反,由於發行商錯過了潛在的利息收入,因此認購證在利率上升時,理論上會提高輪價。而PUT輪就相反。