課堂重點
本課講解窩輪價格的組成部分，包括內在值及時間值。
今日要同大家介紹兩個概念，分別係資產價格、同時間，對窩輪的影響。
價外、到價、價內
每隻輪都有一個行使價，我地會用「價外、到價、價內」黎形容三種唔同嘅情況。以Call輪為例，當行使價高於資產現價時，會叫做「價外」，低過就叫「價內」。
Put輪嘅概念剛好相反，當行使價高於資產現價，窩輪屬於「價內」，低過就叫「價外」，而行使價剛好等同資產現價時，就會叫做「到價」。
投資者可能會問，行使價高定低，點影響到我嘅選擇呀？一般黎講，越價外，風險就相對越大，回報亦理論上越高。就好似爬山咁，假如你去全香港最高嘅大帽山爬山，目標打算爬500米，難度當然細啲，望出去嘅風景算係幾唔錯；但如果你再爬高啲，打算爬到上900米，難度當然再高啲，不過如果真係爬到900米，望出去嘅風景，又會比500米靚好多，即係回報又好啲啦，但萬一沿路好崎嶇，分分鐘去唔到咁高，成身汗之餘仲會咩風景都睇唔到。套返入窩輪，價外幅度越高，隻窩輪倍大潛在利潤嘅幅度亦都越高，但係風險會大左，如果睇錯左，輸錢嘅幅度都會大左。
跟住睇埋年期，每隻窩輪都會有個到期日，而簡單黎講，窩輪的年期愈長，價值就會越高。點解呢？用返爬山嘅例子，要你爬到上大帽山500米的位置，俾5個鐘你，同俾8個鐘你，邊個機會大啲？自然係8個鐘，因為可以俾你爬山嘅時間多啲嘛。
套返入窩輪，如果年期長啲，即係有多啲時間俾隻正股，升到同跌到個行使價位置，多左時間即係代表機會大左，風險就自然低啲啦。調返轉頭諗，如果年期短啲，俾正股郁嘅時間冇咁多，風險就自然大啲，但潛在回報同虧損的幅度，亦會大左。
總結資產價格同時間呢兩個因素，就可以引伸落跟住嘅概念，就係一隻窩輪的價值，主要由兩部分組成，第一是內在值，第二則是時間值。
內在值及時間值
窩輪價值 = 內在值 + 時間值
內在值只係出現在價內輪身上，就是相關資產價格同行使價的差距給予到嘅價值，價外輪就冇內在值嘅；至於時間值就好簡單，是指隻窩輪在到期日前所擁有的價值，年期長的價值比較大，年期短的價格則比較低。
用返頭先個例子，5個鐘即係時間值，行使價係500米。5個鐘內去唔到500米就好似窩輪未變價內，咁內在值就係0；但如果一早已經上到500米或以上，睇到嘅額外風景就係賺左嘅內在值喇。
*以上例子的目的是以日常生活來比喻窩輪的某一種條款或特性，讓投資者更容易初步了解窩輪產品。以上例子並不能代表亦不能完全覆蓋窩輪的所有條款或特性。投資者投資時需要全面了解窩輪的條款，特性和風險。