法巴輪證課程 「海外連線」第五課：商品輪初探 – 黃金輪

上一課我地講咗石油，今日我地輪到講黃金。平時買金，通常都係有實際需要，例如有婚嫁、喜事咁，有啲人鍾意買金條、買金幣黎儲，等佢升值，但係買賣實金通常都比較麻煩，你要親身去銀行或者金鋪買，成本高，買咗仲要搵地方擺，如果喺銀行冇租保險廂，分分鐘仲要買個夾萬返屋企！

紐約期金

所以除咗有實際需要，如果用喺投資方面，好多人都會諗吓有冇其他產品，其中一種就係直接買紐約期金合約，通常一張合約係100盎司，價值係期金價格乘以100，即係十幾萬美金，仲貴過期油合約！不過同期油一樣，通常俾按金就玩得，一般都係幾千蚊美金，而且屬於期貨產品，有槓桿、自然亦都有補倉風險。

黃金ETF

金礦股同石油股一樣，都受自身企業因素影響，未必能夠緊貼金價或油價走勢，而市面上仲有黃金ETF，價格會跟隨金價而變化，入場成本係幾千至一兩萬不等，但散戶比較難沽空，未必咁易開到淡倉，而除咗買賣ETF需要俾交易徵費外， ETF仲包括咗基金管理費。

黃金輪

想集齊晒兩種部署方法嘅優點？黃金輪或者係選擇之一，黃金輪係一種同倫敦金掛鈎嘅窩輪產品，但由於係用紐約期金黎對沖，所以輪價跳動係參考紐約期金嘅變化。黃金輪有槓桿，可以睇好亦可以睇淡，入場費相對較低，用港股戶口就買得，而且最大損失只係全部本金，冇補倉風險，睇吓呢個比較圖表就一清二楚啦。

影響窩輪價格的因素

值得一提嘅，無論係上一課講過嘅期油輪，抑或係啱啱講過嘅黃金輪，本質上都係窩輪，亦即係咁多堂以黎講過嘅引伸波幅、實際槓桿、時間值、街貨量、買賣差價等因素，全部都適用喺商品輪上，唔知大家仲記唔記得呢？唔記得？大家就要溫返書，搵返「法巴學堂—認股證篇」黎溫習吓啦！