法巴輪證課程 「海外連線」第二課：外匯輪名字解說

上一課我地講過，外匯輪就係同外幣匯率掛鈎嘅窩輪，咁究竟係點掛法呢？同指數輪或股份輪唔同，佢地係同單一資產掛鈎，好似係匯豐call輪，又或者係恒指牛證咁，但外匯係指兩種貨幣之間嘅關係，所以同外匯輪掛鈎嘅，其實牽涉到兩種資產。

美元與窩輪的關係

市面上，而家有同歐元兌美元、英鎊兌美元、澳元兌美元，以及同美元兌日圓掛鈎嘅窩輪提供。你會見到呢啲匯率，都同美元有關，原因係美元係國際儲備貨幣，主要商品都係用美元計價，而喺國際貨幣嘅顯示上，「美元匯價」，即係美元同其他貨幣嘅匯率，亦係最常用嘅表達方式，加上美元嘅流通量夠高〝所以外匯輪嘅掛鈎貨幣，都會涉及到美元。

歐美﹑英美﹑澳美外匯輪

準備好喇，就要睇下點樣部署。首先我地要認識外匯輪嘅名。用例子說明，一隻個名叫「歐美認購」嘅窩輪，係一隻同歐元兌美元掛鈎嘅認購證，認購證係方向，代表呢隻係睇好嘅產品，咁睇好啲咩呢？留意呢度喇，方向係用喺外匯輪個名上面，行先果種貨幣，即係睇好歐元啦，但記唔記得頭先講，外匯匯率係一種相對價值，所以當睇好一種貨幣時，同時亦係睇淡緊另一種貨幣，所以一隻歐美認購，係一隻睇好歐元、相對睇淡美元嘅產品。

舉多隻例子，一隻個名叫「英美認沽」嘅窩輪，認沽係方向，代表睇淡一啲嘢，睇淡嘅係隻輪名字上行先果種貨幣，即係睇淡英鎊，相對睇好美元啦。

呢個表總結左各種外匯輪嘅方向，大家就唔怕睇錯啦。

美日﹑美加﹑美人外匯輪

不過細心嘅投資者可能發現，唔係話有美元兌日圓窩輪咩？係呀，日圓要特登抽出黎講，因為佢個情況有啲唔同。由於日圓面值細，在國際貨幣顯示上，會用美元兌日圓黎表達，係同歐美、英美等調返轉，所以相關窩輪的方向都有唔同。 如果你睇好日圓會升值，其實你應該考慮部署美日認沽證，因為呢隻係睇淡美元、相對睇好日圓嘅產品，至於睇淡日圓會貶值，調返轉，要買CALL輪，美日認購證，因為呢隻係睇好美元、相對睇淡日圓嘅產品。嗱，個表加埋美日輪，就齊齊整整啦！

如果大家有興趣部署外匯輪，就千祈唔好睇錯隻輪代表嘅方向啦！