法巴輪證課程 「海外連線」第一課：外匯輪初探

經過咗法巴學堂 – 認股證篇的教學之後，相信大家對窩輪已經有一定程度嘅認識，不過我地講黎講去，都係集中喺指數同股票產品上，但人點可以咁無大志呢？唔可以只係局限喺本地，我地要衝出香港！窩輪嘅掛鈎資產，除左指數同股票外，其餘仲包括外匯、商品、外國指數、外國股票等等架！作為海外連線嘅第一課，我地先講外匯窩輪。

諗起外匯，你諗起咩呢？去旅行唱錢？上網shopping計下信用卡點兌外幣？呢啲都係外幣喺日常生活嘅應用上，但其實外匯亦都係一種投資工具。一種貨幣嘅匯率，受到好多因素影響，好似經濟、政治、國力強弱、以及投機炒賣等。呢幾年我地成日聽到咩量化寬鬆、央行加息減息，同埋英國脫歐等，呢啲事件對外匯都有舉足輕重嘅影響。

投資外匯

至於外匯輪，顧名思義，就係同外幣匯率掛鈎嘅窩輪產品。喺講咩係外匯輪之前，諗下通常大家點投資外匯。最傳統嘅方法，可能係你阿媽同我阿媽都會做嘅，就係去銀行唱定啲外幣等升值，有啲貨幣高息啲，可以賺到較高利息，呢種部署方法雖然風險較低，但局限性就好大，只可以買升，唔可以買跌，而且投入本金較高，對於可以承擔高啲風險、想要高啲回報嘅投資者，未必係一個好選擇。

槓桿式外匯買賣

至於有槓桿的選擇， 一般黎講，主要係揀槓桿式外匯買賣，但呢種部署方法涉及孖展，最大損失唔單止係本金，仲有機會要補倉，風險亦都因此提高，並且需要開設外幣孖展戶口。

外匯窩輪

外匯輪，可能係另一個選擇。外匯輪同窩輪一樣，最大的損失只係全部本金，投資者有數得計，而且用港股戶口就可以買賣，並且提供睇好同睇淡兩個方向嘅產品，部署上更靈活。

明白到外匯輪有咩特性，跟住我地就會講解外匯輪嘅條款啦，記得繼續留意法巴學堂。